دمعت عيني اليوم- شعر جزائري بقلمي.

دمْعتْ عيني اليوم تبْكي جوْر البين

يا خُوتي وَشْحال جالبْلِي لَمْحان

يا هاجسْ ألْهمْني بيتين

من غيْركْ لشْعْر مانُطْرُقْ بيبان

نُوقُفْ عنْ أطلالْ ياما ضَمّتْ زيْن
بالي طول الليْل في طَيْفَهْ شرْدان

فاتتْنا لَيّام وابْقينا بْفَجّيْن

لُوّلْ فيه الموت والثاني لَشْجان

باللَّهْ يا صدّاح هذا النّغْم الزّيْن

ياوشْواش الطّيْر علَّمْني للْحان

َ ونْغَنّي بيتين فيهم نرْثي عيْن

كانت منبع خير ياتيه الرّكْبان

تَتْلاقى الشّبان والشِّيبْ صَفّيْن

ماواحدْ منْ بيْنهم يمْسي غضْبان

يوردْها فالصّيفْ قُمْري في وَقْتَيْن

مَسّيتهْ في يوم وَعْطورهْ ريْحان

قُتْلَهْ يا مزْيون ناولني صَطْلَيْن

لَوْ تَدْري من ويْن صايرْليِ ضمأن

حَدَّقْ في عَيْنايْ وَرْشَقْني بْسَهْميْن

فاتوا منِّي الصّدْر لْمْكان لْكتمان
وُدْرى بلِّي صارْ في نفسي فِلْحين

وَتْبسَّمْ مسرور عْلِّي منِّي بان
راح وْخَلَّى الْعَطْش ناحرْني بْسكّين

تاركْ بَسْمتْ هَزْلْ تَطْبعها ألوان
منها فلبي ذاب وَنْشا طرْ نَصْفين

لُوُّلْ مَدْري بيه والثاني ديوان

سلمت يداك

» عيني تبكي بحرارة
» إختناق .... بقلمي
» رسائل دعوية الجزء الاول بقلمي